Првиот состанок на Европската политичка заедница ги собра лидерите на 44 земји

Македонската делегација предводена од премиерот Димитар Ковачевски учествува на првиот состанок на Европската политичка заедница во Прага. Главна тема на првиот состанок на лидерите од 44 држави е енергетската и економската криза како последици од руската инвазија во Украина, како да се гарантира безбедно снабдување со енергенси по прифатливи цени, поддршка на растот и работните места и намалување на сметките за енергијата за ранливите групи граѓани.

„Го делиме истиот континент и се соочуваме со истите предизвици. Ќе разговараме како да ја подобриме соработката за да имаме поголема стабилност, безбедност и мир“, изјави Шарл Мишел, претседател на Европски совет.

„Ако видите кој учествува, ќе ја видите важноста. Целиот Европски континент освен Белорусија и Русија, кои се изолирани. Темите се екстремно важни, стабилноста на европскиот континент, како заеднички да ја подобриме и како би реагираме ако има понатамошна ескалација на ситуацијата во Украина. Како ќе се справиме со енергетската криза и инфлацијата“, изјави Александар Де Кро, премиер на Белгија.

„Ќе разговараме за безбедноста, единството и економијата. Овде ќе видиме дека Европа е солидарна против руската инвазија врз Украина овде зборуваме за европската политика, не само во контекст на ЕУ. Тоа е добро, оти доаѓајќи од Исланд, важно е да зборуваме за иднината на Европа во поширок контекст“, изјави Катрин Јакобсдотир, премиер на Исланд.

На маргините на состанокот во Прага, Македонија и Украина потпишаа договор за слободна трговија за натамошна либерализација на трговијата со земјоделско-прехранбени производи меѓу двете држави, бесцарински извоз на свежо овошје и зеленчук и намалена царина при извоз и увоз на голем број производи. Уште еднаш била потврдена поддршката на украинската независност, суверенитет и територијален интегритет.

Ирина Гелевска