Пет компании инвестираат во индустриската зона „Прилеп 1“

Пет нови погони почнуваат да се градат во индсутриската зона „Прилеп 1“. По графичка, прехранбена и трикотажна, уште две прилепски фирми од прехраната и градежништвото ги прошируваат капацитетите и инвестираат во производството.

„Двајца инвеститори ќе бидеме. Едниот за прашкасти производи, а другиот ќе има елементи од градежништвото што ќе ги работи во внатрешноста на објектите. Објектот е на 1.100 метри квадратни“, вели Миле Илиоски, бизнисмен- инвеститор во зоната.

„Ќе го прошириме работењето во доменот на градежништвото, ќе отвориме хала и стовариште за производство и на ПВЦ- програма“, вели Тоде Илиоски, бизнисмен.

Ќе се ангажираат млади технолози, дел со меѓународно искуство. Домашниот пазар е приоритет за двајцата инвеститори.

Со ова на пет од 21 парцела во зоната  до крајот на летото ќе никнат новите хали.

Петте фирми кои први почнаа да ги прошируваат капацитетите во Индустриската заона „Прилеп“ донесоа инвестиција од вкупно 2 милиона евра со над 350 нови вработувања.

Локалните власти имаат обврска да ја комоплетираат инфраструктурата.

„Инвеститорите веднаш по нашето комплетирање на инфраструктурата влегоа и почнаа со градба на своите капацитети, така што очекуваме сите 21 парцела што беа продадени минатата година да почнат да градат“, вели Илија Карески, раководител на одделението за урбанизам при локалната самоуправа во Прилеп.

Првата индустриска зона „Прилеп 1“ ќе ги прошири речиси сите дејности во прилепското стопанство и треба да обезбеди околу 2.000 нови работни места.

Елизабета Митреска