Медот на Балканот: Дали најслатката работа на светот наскоро ќе исчезне?

Александар и Зоран Маринковиќ го собираат медот. Браќата водат успешен бизнис, но се загрижени за иднината. Климатските промени нанесуваат голем удар врз пазарот. Промената на временските услови и растот на температурите ја нарушуваат рамнотежата на природата. Резултат – пчелите произведуваат помалку мед.

„Порано, кога имавме 200 до 300 пчелни семејства, нашето производство беше 4 до 5 тони мед. Сега, оваа година, кога моментално имаме околу 1.000 пчелни семејства, приносот е речиси ист или производството“, вели Зоран Маринковиќ – пчелар.

„За да го намалиме нашиот ризик од загуба, апелирам до сите пчелари да посеат што повеќе медоносни растенија и медоносни дрвја“, додава Александар Маринковиќ – пчелар.

Не е само медот тој што наскоро може да стане реткост на локалните пазари. Одгледувањето овошје и зеленчук е директно поврзано со здравјето на пчелите. Фармерите забележале видливи промени во пчелните кошници и се загрижени

„Ги нема пчелите во сандаците, празни се сандаците, можеби и болест имаат и другите се жалат“, вели Божана Костовска, продавачка.

Медот во иднина може да биде луксуз, вели Венче Билбиловски, претседател на пчеларското здружение „Матица“. Земјоделците сè уште користат премногу пестициди, а општиот недостаток на знаење ги зголемува проблемите предизвикани од климатските промени. Клучно решение е образованието. Но, ќе треба да се преземат и други мерки.

„Единствено може пчелите да се преселуваат на повисоките места, каде што температурите ќе бидат пониски и се надеваме дека ако пчелата со милиони години опстоила на овие простори и во светот дека нема да се случи да дојде до намалување на производството“, смета Венче Билбиловски, претседател на пчеларското здружение „Матица“.

Опстанокот на пчелите е важен за нашиот еко-систем. Затоа младите пчелари Александар и Зоран прават сè што е во нивна моќ за да ги заштитат своите пчели.

Викторија Милевска/ DW- Balkan Booster