Расте потребата од негователи во Кичево

Дваесет негуватели, веќе една година водат грижа за старите и изнемоштени лица во кичевско. Интересот за оваа мерка е голем. Причини се масовното иселување на младите и недостигот на дом за згрижување на луѓето во третата доба.

Педесет и шест стари лица во кичевско добиваат секојдневна нега. Една од нив е Даница Атанасовска, која вели дека животот и се променил кога добила личен асистент.

„Ми помага во се, тие физички работи што не можам да ги извршувам поради болки во коските, рацете и нозете. Супер е задоволна сум“, вели Даница Атанасовска корисник на домашна нега.

„Имаат помош од терапија примање, мерење притисок, шеќер мерење, одење и носење до болница, пазарење“, вели Милена Матевска негувателка.

Во југозападниот регион нема Дом за стари лица, па во сите општини долга е листата на чекање за негуватели за домашна грижа.

„Веќе имаме листа на чекање на корисници и се надеваме дека во претстојниот период ќе имаме можност за проширување на тимот на негуватели, пред сè нови лица да поминат обуки“, вели Ана Божиновска, координатор на проектот.

„Веќе 12 месеци се имплементира оваа услуга и се чувствува задоволството на нашите корисници лицата во трета доба“, вели Ивана Лазевска од Црвен крст Кичево.

„Домашна грижа за стари лица“ е проект на Светска банка во соработка со Министерството за труд и социјална политика.

Соња Рилковска