Русија ракетираше инфраструктурни објекти во Украина, делови од Киев без струја

Русија ги обнови ракетните напади врз клучни инфраструктурни објекти во поголемите украински градови, вклучително и престолнината Киев. Експлозиите предизвикаа прекин на електрична енергија и водоснабдувањето.

„Вооружените сили на Руската Федерација продолжија со нападите со високопрецизно воздушно и морско оружја со долг дострел против воената команда и енергетските системи на Украина. Целите на нападите беа постигнати. Сите цели беа погодени“, изјави Игор Конашенков, портпарол на Министерство за одбрана на Русија.

Претходно, Русија ги обвини Украина и Обединетото Кралство за „терористички напади“ врз бродовите на Црноморската флота во анектираниот полуостров Крим и најави повлекување од иницијативата за жито. Претседателот Зеленски го обвини Кремљ за се поголемиот недостиг на храна во светот поради напуштањето на договорот за извоз на храна и дека го користи истиот како уцена.

„Русија е единствениот виновник за тоа што храната сега ќе стане поскапа во голем дел од Западна Африка до Источна Азија. Русија е причината зошто луѓето, особено во Етиопија, Јемен или Сомалија, се оставени со катастрофален недостиг на храна“, изјави украинскиот претседател, Володомир Зеленски.

И покрај откажувањето на Русија од договорот за житото, повеќе товарни бродови се во движење пред црноморскиот брег на Украина. Украина, Турција и Обединетите нации се договорија за план за движење на 16 бродови кои се во турските води

„Клучните прашања за оваа година се инфлацијата која е висока и останува двоцифрена, а главно поттикната од цените на храната и енергијата. Нивото на неизвесност е исклучително високо, особено за прашањата за безбедноста на храната“, изјави Џихад Азур, директор на одделот за Блискиот Исток и Централна Азија во ММФ.

Цената на житото на светските берзи драстично се зголеми, а потегот на Москва наиде на осуда од голем број држави и организации.

Маријана Димовска