Евроинтеграции

Извештајот на ЕК пред Националниот совет, нотирана политичка поларизација

31.10.2022 14:52

Извештајот на Европската комисија за напредокот на земјава пред Националниот совет за евроинтеграции, нотира политичка поларизација во Законодавниот дом. Собранието за прва пат е вака ниско оценето, забелешки и за користењето на европското знаменце, констатира опозицијата. Владејачкото мнозинство со став – најгорлив проблем е имплементацијата на законите…

Стабилен континуитет во напредокот на државата е ставот на Секретаријатот за европски прашања во однос на извештајот на Европската комисија за 2022-ра година. Националниот преговарач за евроинтеграциите на земјава, Маричиќ, смета дека извештајот е објективен приказ на реформите и констатиран напредок во 23 поглавја.

Евроамбасадорот Гир посочи дека годинешниов извештај, прв по почнувањето на скрининг процесот, претставува упатство за делување на националните институции и политички субјекти. Тој ја потенцираше забелешката од Брисел за политичка поларизација на Собранието. Претседателот на собраниската комисија за надворешна политика Адеми, прецизен во обврските на Законодавниот дом. Вели уставни промени и внесувањето на бугарската заедница во Уставот се дел од Францускиот договор.

Според компаративната анализа на извештајот со другите држави од регионот, како и за годините наназад, која ја презентираше пратеникот од ВМРО-ДПМНЕ, Милошевски, годинешниот напредок е со најмала оцена. Собранието за прв пат е вака ниско оценето, и тоа во период на ова владејачко мнозинство кое Деловникот го користи како список за одење во продавница, одбира што му треба и што сака – вели Милошевски. Тој посочи и на забелешката од извештајот за злоупотреба на европското знаменце. Според пратеничката Калевска-Ванчева, пак, најгорлив проблем е имплементацијата на законите.

Билатералниот скрининг кој ќе го покрие целиот спектар на европските политики во сите поглавја ќе се одржи на 11-ти ноември.

Марина Стојанова Тонева