Куманово: Недостиг на персонал во Домот за стари лица
Негуватели и помошно технички кадар недостигаат во кумановскиот дом за стари лица. Од оваа установа информираат дека веќе е доведено во прашање функционирањето на установата. Извесен период бараат Министерството за труд и социјална политика да им овозможи вработувања. Домот кој е еден од постарите во земјава, згрижува над 150 корисници од речиси сите градови во државата. Надлежните стравуваат дека ќе бидат принудени да прекинат договори.
Домот за стари лица „Зафир Сајто“ во Куманово нема доволно персонал за нормално функционирање. Од оваа установа информираат дека за проблемот неколкупати алармирале до надлежните од Министерството за труд и социјална политика. Согласно решенијата на Државниот инспекторат за труд, веќе не ги исполнуваат основните нормативи и не можат да пружат нега на корисниците. Недостигаат најмалку 15 лица, негуватели како и помошно технички персонал.
„Ние во институцијата имаме 150 корисници, по норматив треба да имаме 15 негуватели. Тоа значи на 10 корисници оди еден негувател. Ние во моментов имаме осум негуватели, да не продолжувам со останатиот персонал каква е состојбата слична е. Во август остварив и средба со министерката, ни беше ветено дека проблемот ќе биде решен“, рече Дејан Стојановски, директор на Дом за стари „Зафир Сајто“ Куманово.
Со овој проблем кумановскиот дом кој е еден од поголемите во државата и згрижува корисници речиси од сите градови, се соочува веќе девет години. Според сознанијата велат Министерството за финансии издало согласност за вработувања, но документот речиси еден месец се заглавени во труд и социјала. Дополнуваат дека инспекторатот забранил и привремени вработувања преку агенцијата.
„Доколку бидеме принудени ние дефинитивно ќе прекинеме некои договори“, дополнува Стојановски.
Старскиот дом од Куманово за проблемот ги известил и државниот управен инспекторат и инспекцискиот совет. Од Министерството за труд и социјална политика побаравме, но не добивме одговори.
Елена Георгиевска