Шојгу нареди повлекување од Херсон

Рускиот министер за одбрана Сергеј Шојгу денеска им нареди на московските трупи да се повлечат од градот Херсон во јужна Украина, кон кој украинските сили напредуваат со недели.    

„Започнете да ги повлекувате војниците“, рече Шојгу за време на телевизискиот состанок со рускиот командант во Украина, Сергеј Суровикин, кој рече дека предложил „тешка одлука“ за повлекување од Херсон и поставување одбрана на левиот брег на реката Днепар.

Како што пренесуваат странските агенции, најавата на рускиот министер би претставувала едно од најзначајните руски повлекувања и потенцијална пресвртница во војната што трае речиси девет месеци.

Рускиот генерал Сергеј Суровикин во изјава за руски медиуми нагласи дека веќе не е можно да се снабдува Херсон. Тој додаде дека предложил воспоставување одбранбени линии на источниот брег на реката Днепар.

Руската одлука уследи по неколкунеделното напредување на украинските сили во градот и руските напори за евакуација на повеќе од 100.000 жители на Херсон.