Зеленски со предлози за ставање крај на војната
Вратете го Путин на преговарачка маса, побара францускиот претседател Макрон од кинескиот колега Кси Џинпинг. Зеленски со апел-војната мора да заврши веднаш. Лидерите на Групата 20 најразвиени, на самитот на Бали решаваат за светските предизвици – конфликтот во Украина, климатските промени, економската и енергетската криза…
Украинскиот претседател Зеленски во неговото виртуелно обраќање на самитот на Г-20 во Бали претстави 10 предлози на Киев за ставање крај на војната. Меѓу другото, побара враќање на територијалниот интегритет на неговата земја, повлекување на руските трупи, ослободување и враќање на затворениците и на депортираните, нуклеарна и енергетска и безбедност на храна. Зеленски ги повика државите-учеснички на самитот да и помогнат на Украина да ја прекине војната.
„Русија мора да ги повлече сите свои војници и вооружени формации од територијата на Украина. Контролата на Украина над сите делови од нашата државна граница со Русија мора да биде обновена. Тоа ќе резултира со вистински и целосен прекин на непријателствата“-нагласи Зеленски.
Мнозинството држави-учеснички повикаа на продолжување на договорот со кој се овозможува извоз на украинското жито. Првиот човек на Европскиот совет, Шарл Мишел побара Пекинг да го искористи своето влијание врз Москва и побара глобалните сили да го засилат притисокот врз Русија.
„Руската војна влијае на сите нас, без разлика каде живееме, од Европа до Африка или Блискиот Исток. Единствениот начин да се стави крај на кризата со храна и енергија е Русија да стави крај на оваа бесмислена војна и да ја почитува повелбата на Обединетите Нации“, рече Шарл Мишел, претседател на Европскиот совет.
Повеќето членки на Г-20 ја осудија руската агресија врз Украина.
„Ако војната не заврши, на светот ќе му биде тешко да оди напред, ќе ни биде тешко да преземеме одговорност за иднината … Не смееме да дозволиме светот да падне во нова Студена војна“, изјави Јоко Видодо, претседател на Индонезија.
Францускиот претседател Макрон апелираше до кинескиот колега Џинпинг да се обиде да го убеди рускиот претседател Путин да се врати на преговарачката маса. Шефот на руската дипломатија Лавров по средбата со Макрон рече дека украинската страна категорично одбива да води какви било преговори и поставува услови кои се очигледно нереални и несоодветни на ситуацијата.
„Ние повеќепати потврдивме дека не одбиваме да преговараме. Ако некој одбива да преговара, тоа е Украина. Колку подолго продолжи да одбива, толку потешко ќе да се постигне договор“, рече Сергеј Лавров-министер за надворешни работи на Русија.
Климатските промени, инфраструктурата, технологијата, инфлацијата, зголемените цени на храна, гориво, недостаток на енергенси-дел од другите важни теми на средбите на Бали.
Маријана Димовска