Зачестени физички пресметки меѓу малолетници

Седум физички пресметки меѓу малолетници од почетокот на годината се случиле на подрачјето на Куманово. Од кумановската полиција информираат дека ова е благо зголемување. Лани била евидентирана само една тепачка. Случаите се расчистуваат, а во постапката се вклучени и инспектори по малолетничка деликвенција и семејно насилство.

-СВР Куманово преку полициските службеници од Отсекот за превенција континуирано спроведува едукативни предавања со наставници, ученици и родители пред сè им се укажува за превенцијата од врсничкото насилство, потоа од насилството на социјалните мрежи и начините за рано препознавање и навремено спречување на овие форми на насилство, вели Ивана Младеновска, портпарол на СВР Куманово.

Стручните лица сметаат дека во справувањето со овој проблем најзначајна улога треба да имаат семејството и образованието.

-Ние како држава не водиме точна и прецизна статистика за какви облици на насилство и агресија има меѓу учениците би кажала дека родителите се тие први кои треба да забележат дали кај нивото дете има промена во однесување, дали има психичка агресија која не е толку видлива или пак се работи за видлива агресија како физичко насилство. Не можеме да ги изоставиме градинките, основните и средните училишта каде што се повеќе забележуваме драстичен пораст на различните видови на насилничко и врсничко насилство, нагласува Анита Стојчевска, специјален едукатор и рехабилитатор, магистер по малолетничка деликвенција,

Кумановската јавност бурно реагираше на последната физичка пресметка, кога група млади бркаше едно лице. Тепачка беше регистрирана и во средно училиште.

Елена Георгиевска