Немири во Брисел по победата на Мароко над Белгија во Катар

Немири во европската престолнина по победата на Мароко над Белгија, на Светското првенство во Катар. Десетици фудбалски навивачи во Брисел ги нападнаа редарските служби и урбаната опрема во градот. Фудбалските навивачи кршеле излози, користеле пиротехника и палеле возила. Полицијата употреби водени топови и солзавец за да ја растера толпата.

„Откривме дека група млади лица им се спротивставила на безбедносните сили. Биле фрлени пиротехнички средства. Полицијата мораше да интервенира со водени топови. Користевме гас и избравме да ги растераме сите тие луѓе“, изјави Илсе Ван де Кери, портпаролка на полицијата во Брисел.

Во белгискиот главен град живеат илјадници марокански доселеници, а стотина од нив приредија вистински хаос. Полициските сили ги повикаа жителите и навивачите да избегнуваат некои населби во центарот на градот. Станиците на метрото беа затворени, а улиците блокирани за да се спречат собири. На една од улиците избувнал поголем пожар.

„За мене тие се насилници. Тоа не се фудбалски поддржувачи. Тие беа таму за да се бунтуваат. Тие се предизвикувачи, а не поддржувачи. Многу марокански поддржувачи уживаа на фудбалскиот натпревар, но голем дел од нив правеа нереди“, изјави градоначалникот на Брисел, Филип Клоус.

Немири и во Холандија. Полицијата соопшти дека дошло до насилство и во пристанишниот град Ротердам, при обид да разбие група од 500 фудбалски поддржувачи кои возвратиле со огномет и стаклени предмети.

Маријана Димовска