Уставниот суд не поведе постапка, недела останува неработен ден
Уставниот суд на денешната седница одлучи да не поведе постапка за предметот во кој беше оспорено работењето во недела, информира на прес-конференција портпаролката на Уставниот суд, Христина Беловска …
Недела останува неработен ден. Уставниот суд не поведе постапка по иницијативата на Стопанската комора со којашто се оспоруваше работењето во недела. Одлуката е донесена со мнозинство гласови и како што објаснуваат од судот – таа е конечна и мора да се почитува.
За Сојузот на синдикатите на Македонија, ваквата одлука на Судот е победа на заложбите недела да остане ден за одмор.
„Уставниот суд ја враќа вербата на работниците и на синдикатот како нивен претставник и застапник, во владеењето на законите и правда за сите во државата и покрај барањето и притисоците на одделни работодавачи кои водени од желбата за сопствен профит се обидоа да го намалат и елиминираат ова гарантирано право на работниците“ – оценува Сојузот на синдикатите.
Стопанската комора го оспори Законот за работни односи и во иницијативата наведе дека ден на неделен одмор може да биде кој било друг ден во седмицата, но и дека со утврдувањето додаток на плата за работа в недела од најмалку 50 отсто се создава правна несигурност.
Анита Димитријевска Велковска