Музичка прошетка низ дваесетгодишниот репертоар

Македонското дуо ДНК ја дефинирираше идеалната роденденска прослава за еден изведувач. Со полна сала фанови, пријатели и соработници, Андреј и Панчо го прославија 20-тиот роденден на нивното заедничко музичко патување.

Публиката броеше повеќе од 7.000 посетители од сите возрасни категории, но на крајот на вечерта заклучокот беше дека тоа е податок од второстепена важност, додека пак од примарна важност беше фактот што сите до еден, без хипербола, наизуст ги знаеја и пееја песните на ДНК.

Исклучително симпатично беше тоа што во публиката се забележуваа и цели семејства, родители со деца, што укажува на тоа дека музиката на ДНК оставила меѓугенерациски белег.

На сцената пак, Андреј и Панчо во придружба на фул-бенд со енергија „низ плафон“ и со цело срце ги изведоа бројните хитови и ја одведоа публиката на двочасовна музичка прошетка низ дваесетгодишниот репертоар.

Концертот го збогатија и многу гости. Како гласни поддржувачи на младите артисти, ДНК во текот на вечерта им отстапија минути на Јанг Дади, Таско, Мина Блажев, но исто така и на изведувачи и соработници од старата гарда како Наум Петрески, Тамара Тодевска, Џамбо Агушев оркестарот и Магдалена Цветкоска – Ена.

За крај, како што беше најавено – концертот имаше и хуманитарна нишка, односно дел од средствата од продадените влезници и новиот албум на ДНК се наменети за Фондацијата Марко Божиновски која има за цел да помага на млади луѓе во социјален ризик, особено на спортски таленти во оваа категорија.