Обид за државен удар во Германија
25 лица уапсени во голема полициска рација во Германија. Осомничени се за планирање на упад во зградата на Парламентот. Движењето „Граѓани на Рајхот“ не ја признава модерната германска држава и се обидува да го врати државниот модел од 1871 година. Властите ја следат за неуставни активности од 2016 година...
Спречен обид за државен удар во Германија. Ултрадесничари и поранешни воени лица планирале упад во Бундестагот, уривање на владата и преземање на власта. Меѓу уапсените симпатизери на екстремистичката група „Граѓани на Рајхот“ се откриени и резервисти, активен војник и судијка од партијата на екстремната десница „Алтернатива за Германија“. Како главен мозок на операцијата е идентификуван 71-годишниот таканаречен „Принц Хајнрих XIII“. Акцијата „Соко-сенкс“ ја спроведоа 3.000 припадници на безбедносните служби. Претрес извршија на 137 објекти во сопственост на 52 осомничени.
„Треба да сме загрижени и поради тоа што ова не се глупави луѓе, туку академски граѓани, со одредено искуство, пристап до оружје, информации, со пристап до луѓе. И целиот конгломерат го дава ова особено опасно и вредно за внимание“, рече Себастијан Фидлер, експерт за внатрешна политика, СПД.
Припадниците на „Граѓани на Рајхот“ не ја признаваат модерната германска држава и се обидуваат да го врати државниот модел од 1871 година. Одбиваат да плаќаат даноци и прогласуваат мали т.н. „национални територии“ на имоти кои ги нарекуваат „Втора Германска Империја“, „Слободна пруска држава“ и „Војводство Германија“. Меѓу другото, печатат свои пасоши и возачки дозволи на самопрогласените држави. Според процената на властите, организацијата брои неколку стотини членови. Повеќето се мажи над 50-годишна возраст и потекнуваат од социјално загрозени општествени сегменти. Полицијата подолг период ги следи за неуставни активности и насилни инциденти. Во последниот беше нападнат и смртно повредени полицаец за време на рација во Баварија.
Маја С. Филдишев