Приватните превозници во сабота ќе одлучуваат како ќе продолжат со протестите

Зголемен револт кај приватните превозници кон управата на Град Скопје. Најавија дека во сабота координативното тело ќе има состанок и ќе одлучат за понатамошните мерки што ќе ги преземат. Повторно се извинија на граѓаните поради блокадите.

И од „Макекспрес“ во соопштение порачаа дека не се организатори на блокадите. Побараа партиите да не го политизираат протестот.

На улиците со своите возила се приватните превозници кои бараат средба со градоначалничката Данела Арсовска и исплата на заостанатиот долг. Раководството на „Макекспрес превоз“ не знае до кога ќе траат протестите, дали ќе се прошират и други улици и во кој формат ќе се протестира од причина што не е организатор на истите, стои во соопштението од „Макекспрес превоз“.

Град Скопје и натаму стои на позицијата дека не треба да преговараат со превозниците и оти тие долговите треба да си ги побараат на суд.

Приватните превозници веќе четврти ден блокираат клучни крстосници од главниот град. Крстосницата кај Мавровка, крстосницата кај црвениот крст и булеварот Илинденска. Од Град Скопје вчера ја повикаа МВР да интервенира и да ги тргне блокадите.

Ана Ј. Тодоровска