ОЈО Струга оформи три предмети за злоупотреби во Здравствен дом Вевчани

Струшкото обвинителство оформи три предмети за злоупотреби во Здравствениот дом Вевчани. Едниот предмет е за лекар кој работел со лажни документи. Во истрагата обвинителството утврдило дека тој фалсификувал документи и лиценца за работа и со истите аплицирал за вработување.Бил примен во 2018-та. По основ на договорот за вработување, повеќе од три години, пријавениот без соодветна стручна подготовка се занимавал со лекување и давање медицинска помош.Со тоа го довел во ризик здравјето на пациентите, а обвинителството го товари за надрилекарство.

Другиот предмет е за директорот на Здравствениот дом Вевчани, за кого има индиции дека од 2019 година имал сознанија дека лицето кое се претставувало како доктор не поседува лиценца од Лекарската комора, за што бил писмено известен со допис. Директорот заработи кривична за злоупотреба на службената положба и несовесно работење. За истите дела се товари и тричлената комисија за селекција при вработување. Обвинителството ги сомничи дека на оглас во 2019 година во Здравствен дом – Вевчани, дозволиле без лиценци да биде склучен договор и биле примени две кандидатки за приправнички. По неколку месеци кога обезбедиле лиценци, без нов оглас со нив биле склучени договори за вработување.