„Панта реи“ од Бојан Ковски во Археолошкиот музеј

Академскиот сликар Бојан Ковски утревечер (13. декември) ја отвора својата најнова изложба со наслов „Панта реи“. Изложбата ќе биде поставена во Археолошкиот музеј и ќе биде достапна за посетителите до 21 декември.

Животот на Ковски поврзан со водата, како главен извор на животот за целиот жив свет, е инспирација за создавање на овие 12 дела масло на платно. Во делата Ковски ја разработува формата на човечкото тело и природата коишто претставуваат константен тек и перцепција на човековата визуелизација.

„Бојан Ковски е уметник чие творештво се стреми во нагорна линија. Неговиот опус е во процес. Едно дело се надоврзува на друго. Сложена е и специфична структурата на овие уметнички дела во нивниот целосен изглед. Тој ја избира водата како еден од четирите основни елементи на планетата Земја. Водата, иако е една од најпроучуваните супстанции, сепак, е најмалку разбрана. Во неа телата ги истегнува до крајни граници. До неспоивото! Божествена елеганција и крајна експресивност“, нагласува кураторот Анжелика Апсис кон изложбата.

Бојан Ковски е академски сликар, кој своите студии ги има завршено на Факултетот за ликовни уметности под менторство на Антони Мазневски. Во своето портфолио има неколку самостојни и групни изложби и перформанс.