Петровска: Темелно и без импровизации пристапуваме кон изградба на ефикасен систем за заштита на критичната инфраструктура

Министерката за одбрана, Славјанка Петровска денеска со свое обраќање ја отвори јавната расправа за Предлог Законот за критична инфраструктура чија цел е градење на ефективна стратегија за заштита на критичната инфраструктура како врвен национален приоритет.

Министерката Петровска потенцираше дека овој предлог закон кој е изработен од странски и домашни експерти нуди сериозно решение за ефективна заштита на критичната инфраструктура.

„Важно е што поставуваме основа за градење на ефикасен систем за заштита на критичната инфраструктура, процес кон кој пристапуваме темелно и без импровизации“, истакна министерката.

Ова законско решение има јасна цел да воспостави стратешки пристап кон критичната инфраструктура, потенцираше Петровска, која додаде дека  во законот се дефинирани националните и европските критични инфраструктури и се воспоставува национален систем на безбедност преку релевантните чинители на безбедносниот сектор.

„Со ова решение се елиминира можноста да се наштети на физичките и виртуелните средства, институции, компании, мрежи, кои се од суштинско значење, а преку кои се остваруваат виталните функции на државата. Најважно во овој процес на заштита на критичната инфраструктура е што поставуваме добра основа за изградба на отпорност и на критичната инфраструктура, но и на општеството во целост“, додаде Петровска.

Министерката Петровска рече дека предлог законското решение ќе остане на увид на јавноста и по денешната јавна дебата и посочи дека секоја идеја, коментар е добредојден за да се изработи овој документ.

На денешната јавна расправа во Клубот на пратеници, учествуваа и Претседател на Комитетот на проектот МКД НАТО 2030, проф. д-р Марјан Ѓуровски, универзитетските професори Роберт Микац од Република Хрватска, Александра Деановска Трендафилова, Весна Поповска и Горги Алчевски од нашата држава, како и претставници од Министерството за одбрана, од другите безбедносни институции, академската заедница и граѓанскиот сектор во земјата. Со ова обезбедуваме партнерски и инклузивен однос со сите чинители на општеството.