Од денеска ќе се применува системот за управување со предмети во јавните обвинителства

Министерството за правда во координација со Јавното обвинителство на Македонија ги презеде сите неопходни активности за обезбедување на целосна и непречена задолжителна примена на системот за управување со предмети во јавните обвинителства почнувајќи од 1 јануари 2023 година, соопшти министерството.

„Системот претставува основна алатка во извршувањето на основните задачи на јавните обвинителства со која ќе се обезбеди чување информации, следење и архивирање на предметите како и увид во секој момент во статусот на предметите. Со него се обезбедува непрекинат проток на податоци, а основна цел е унапредување и автоматизирање на процесите во јавните обвинителства, подобрување на протокот на информации преку дигитализација, архивирање и чување на документацијата обезбедувајќи притоа висок степен на безбедност, контрола на пристапот и автоматизирана комуникација. За соодветна примена на системот, организирани беа и обуки на јавните обвинители и на останатите вработени“, се вели во соопштението на министерството.