Продолжуваат меѓусебните обвинувања на власта и опозицијата за загадувањето во главниот град

„Нема и не смее да има простор за дневна политика“ – со овие зборови, советничката група на СДСМ ја образложи поднесената иницијатива за свикување вонредна седница на советот за загадувањето во главниот град. Социјалдемократите добиле поддршка од ДОМ и од ЛДП. Претставија повеќе мерки, меѓу кои итно зголемување на бројот на автобуси на сите линии, воведување бесплатен превоз, повеќе пари за борба против загадувањето во градската каса и план за чистење на депониите.

Но, претседателот на советот на град Скопје, Трајко Славевски вели дека поднесокот е некомплетен, бидејќи седница по барање на советници може да се закаже ако се потпишани најмалку третина од 45-те членови на советот, или, најмалку 15 советници.

Од градоначалничката Арсовска добил известување дека таа е на боледување, но, сепак, Славески остави простор вонредна седница да се одржи во почетокот на идната недела.

Од ВМРО-ДПМНЕ оценија дека нема потреба од свикување вонредна седница на советот, зашто СДСМ и Арсовска може да седнат и да се договорат за преземање конкретни мерки за справување со аерозагадувањето.

Александра Спировска