Почнува скијачката сезона на Пониква
Почнува ски сезоната на Пониква. Сместувачките капацитети се подготвени, патот е чист, скијачките патеки и ски лифтовите се во функција. За време на викендите кога се очекуваат повеќе посетители, ќе има и ноќно скијање...
Скијачкиот центар Пониква од денес ја отвора сезоната за зимски спортови. Единствениот скијачки центар на истокот на 1.560 метри надморска висина, годинава е со поголем сместувачки капацитет и се очекуваат повеќе посетители, посебно за време на викендите.
Сезоната започнува со природен снег, но се е подготвено скијачките патеки да се одржуваат и со вештачки снег. Паркинг места има доволно и нема застој во сообраќајот на регионалниот пат Кочани – Пониква. Од овој викенд се планира и ноќно скијање.
Потенцијалот за планински туризам на Осоговските планини е голем и неискористен, велат од Општина Кочани. Владата пред неколку години најави план за изградба на еден ски лифт, четири жичарници, и 13 скијачки патеки на „Царев врв“, односно „Султан Тепе“, но за сега од проектот има само физибилити студија.
Славица Величковска