Се зголемува бројот на интервенции на лекарите од службата за итна помош од Велес

Осетно е зголемен бројот на интервенции на екипите на Итната помош од Здравствен дом Велес, изминатите 12 месеци. Ако во 2021 година имале 26.029, лани имале рекордни 28.865 прегледи. Тоа е по 79 на ден или по 3,3 интервенции на час. Ова се кумулативни бројки за лекарските интервенции и во амбуланта и на терен. Зголемениот број на интервенции биле поради не работата на матичните доктори преку викенд, голем број на села без доктор.

Податоците добиени од Службата за итна помош, покажуваат пораст и на прегледите во амбуланта и на терен. Теренските бројки се однесуваат на населените места од поширокиот велешки регион, во кои влегуваат и соседните општини Чашка и Градско, кога екипите по потреба патуваат и до еден час оддалечените села како Ореше, Папрадиште или Подлес.

Единствена бројка во опаѓање во 2022 е намалениот бројот на повредени при интервенции во сообраќајни несреќи. Имало вкупно 101 повреден. Тука спаѓаат и сообраќајките од делницата на автопатот од Катланово до локалитетот Стоби и обратно. Од службата за Итна помош реагираат и на одреден број лажни телефонски повици, поради кои не можат да стигнат до пациенти на кои навистина им е потребна здравствена нега.

Петар Печков