Таравари: Договорот не е дефинитивен, но влезот на Алијансата во Владата е веројатен

Околу 90 насто од програмските определби се синхронизирани, но за кадровските решенија воопшто не се разговарало, рече Таравари по средбата со премиерот Ковачевски. Договорот не е дефинитивен, но влезот на Алијансата во Владата е веројатен, потврди Таравари.

Според Таравари партијата располагала со најдобри кандидати во областа на здравството.

Во соопштението од Владата се потврдуваат темите поврзани со членството во НАТО, европските интеграции и стратегиското партнерство со САД.

„Во фокус на разговорите помеѓу премиерот Ковачевски и Таравари беа и неприкосновената борба против корупција во контекст на реформските процеси кои се случуваат во државата, како и процесот на скринингот кој досега успешно се одвива, но и процесот на носење одлуки и реформи кои ќе придонесат до што поскора интеграција на земјата во ЕУ“, пишува во соопштението од Владата.

Се разговарало и за односите со соседите, за енергетската криза, за спречувањето на злоупотребата на балансерот, законот за владата, пишува во информацијата од владата за средбата Ковачевски-Таравари. Оттаму дополнуваат дека премиерот во наредниот период ќе продолжи со состаноците со парламентарните и вонпарламентарните партии.

Игор Панов