Нема вакцини против Ковид-19, се чека нова пратка
Истече продолжениот рок за употреба на 250 илјади вакцини Фајзер, кои беа единствениот избор за оние кои сакаа да се заштитат од Ковид. Тие се уништени...
Во текот на неделава се очекува да пристигнат нови вакцини против Коронавирусот, откако на 250 илјади дози „Фајзер“ им измина рокот и беа повлечени од вакциналните пунктови. Од ресорот не прецизираат колку вакцини ќе пристигнат, ниту од кој производител и дали се набавени од државата или ќе бидат донација.
„Во текот на неделава се очекува да пристигнат новите количини вакцини против Ковид-19 и по завршување на законски предвидените процедури во соработка со МАЛМЕД ќе продолжи имунизацијата во пунктовите, за што јавноста ќе биде информирана“, велат од Министерството за здравство.
Здравствените власти додаваат дека интересот за имунизација е слаб. Минатата недела вакцина примиле 34 граѓани, по 7 за прва и втора доза, кај деветмина е аплицирана трета доза, а кај 11 четврта.
И последниот вакцинален пункт против Ковид во поликлиниката „Букурешт“ е затворен. Граѓаните кои сакаат да се имунизираат ќе бидат вратени, бидејќи рокот на последните количини вакцини е изминат.
Со дозвола од МАЛМЕД, досега се уништени приближно 66 илјади вакцини со изминат рок на употреба. Од ресорот велат, како изминува рокот, вакцините се повлекуваат и почнува процедурата за нивното уништување.
Од почетокот на пандемијата беа обезбедени 2 милиони 866 илјади и 700 вакцини, а според податоците на Институтот за јавно здравје, со нив се имунизирани околу 876 илјади граѓани. Повеќе од милион ипол купи државата, а другите беа донација.
Андријана Ѓурческа