Зајакнати контроли на границите, системот повторно во функција

Зголемено присуство на полицијата, засилени контроли, е сликата којашто може да се види од утринава на граничниот премин Деве Баир.

Како мерка на претпазливост поради шпекулациите коишто кружеа во јавноста изминативе денови, на преминот кон Бугарија, како и на патарините кон Скопје, е регистрирано поголемо присуство на полициски припадници. Се работи согласно безбедносен протокол.

По двочасовен застој поради пад на компјутерскиот систем, на Деве Баир, има минимален проток на патници на влезот и на излезот од земјава. Голем број патнички и товарни возила беа принудени да чекаат.

На преминот на македонско бугарската граница беше регистриран и помал инцидент. Тројца бугарски државјани вербално и со недолични зборови нападнаа полициски службеници. Истите се приведени, и полицијата работи на расчистување на случајот.

Повеќе часови на Деве Баир се задржаа и бугарски државјани, кои чекаа да заминат на чествувањето на годишнината на македонскиот револуционер Гоце Делчев во Скопје. Дел од нив одбија да чекаат и се вратија назад во матичната држава.

Според податоците на МВР, од 20 часот до 8 часот утринава, низ овој премин во државата влегле 249 лица од кои 144 странци.

Елена Георгиевска