Тлото не мирува, последователни потреси се регистрираат секојдневно

Постојано расте бројот на загинати во земјотресот, којшто ги погоди Турција и Сирија. Потрагата по преживеани трае веќе осми ден.

Спасувачките екипи успеале да извлечат жена којашто минала таму 170 часа под урнатините. По обновувањето на пистата на аеродромот „Хатај“ оттаму е изведен првиот евакуациски лет кон Истанбул. Зимските временски услови им го отежнуваат секојдневието на жителите во погодените подрачја.

„Ноќе е минус 22 степени. Ќе се обидеме да преживееме до пролет“, изјави жител.

„Спиеме во кал, заедно сме со 3-4 фамилии. Нема доволно шатори, па седиме заедно“, изјави жител.

„Се плашиме дека ќе се рашират болести. Немаме друг избор. Се случи тоа што се случи“, додаде друг жител.

Драматично и во Сирија. Спасувачките акции ги предводат таканаречените „Бели шлемови“, таму веќе стигна првата пратка помош од Европската Унија и од Обединетите Нации.

Тлото и натаму не мирува. Последователни потреси се регистрирани секојдневно.

Маја С.Филдишев