Здравствените работници ќе бараат надзор од Трудовиот инспекторат
Здравствените работници сè уште не зеле плата поради хакерскиот напад врз системот на Фондот за здравствено осигурување. Доколку до утре не им се исплати личниот доход, од Синдикатот на клинички велат дека преку нив, индивидуално или групно ќе го известат Трудовиот инспекторат да изврши надзор и да наложи исплата на платата. Од ФЗОМ најавуваат решавање на проблемот...
Хакерскиот напад врз Фондот за здравствено осигурување, ги остави здравствените работници од Јавното здравство без плата. Синдикалците не исклучуваат ниту поднесување тужба, ако парите на сметките не легнат до 15-ти, кога е законскиот рок.
Конфедерацијата на синдикални организации бара средба со премиерот Ковачевски за решавање на проблемите, во спротивно, се закани со протест. Синдикалците велат дека освен во здравството, доцнење на платите има и во други сектори.
Од Фондот информираа, уверуваат дека се работи на отстранување на проблемот и дека во следните денови системот постепено ќе се враќа во функција.
„Приоритет е враќањето на функционалноста за исплатата на платите на здравствените работници во Јавните здравствени установи, како и враќање на системите на исплата на боледувања, породилно и рефундациите“, се вели во соопштението на Фондот за здравствено осигурување.
Од ФЗОМ смируваат и дека при кибер нападот, нема излевање на податоци надвор од базите на фондот.
Марија Котовска