Македонија напредна 10 места во најновиот извештај на Светскиот економски форум

Во најновиот извештај на Светскиот економски форум за информатичка технологија, Global Information Technology Report, Македонија бележи напредок од 10 места. Оваа година Македонија се наоѓа на 57-то место од 148 земји, додека минатата година земјава беше сместена на 67-то место.

Извештајот го покажува напредокот на земјите не само според развојот на информатички и комуникациски технологии, но и според економското и социјалното влијание, а посебен акцент е ставен на силните точки и слабостите со кои се соочува една земја.

Тука детално се анализираат и предностите и ризиците од работење со големи податоци, таканаречените „big data“, како и користа која може да биде извлечена од јавноста и приватните организации.

Од земјите од соседството, пред Македонија се наоаѓаат Хрватска на 46-то место и Црна Гора на 52-то место, додека после нас се Босна и Херцеговина (68), Бугарија (73) , Грција (74), како и Србија (80). Од поранешните југословенски земји, Словенија се наоѓа најнапред во овој извештај, и тоа на 30-то место.

На врвот на оваа листа, пак се наоѓаат Финска,Сингапур, Шведска, Холандија и Норвешка.

Развиените економии мора да го задржат својот раст и да најдат нови области во кои ќе се развиваат, а младите економии кои се во развој треба да најдат начин да опстојат во турбулентниот пазар и своите иновации и потенцијали мора да ги засилат за да се носат со економскиот раст којшто го имале во минатата деценија, стои во извештајот на Светскиот економски форум.