Куманово: Три дена чади градската депонија

Три дена чади кумановската депонија Краста во село Пчиња. Надлежните од јавното претпријатие Чистота и Зеленило сметаат дека силниот ветер е причина за зачадувањето. Екипи од претпријатието со поддршка на приватни стопанственици со механизација нанесуваат земја. Зафатен е горниот дел од депонијата од платформата. Чадот од депонијата се чувствува во селата Пчиња, како и Студена вода.

„Во внатрешниот дел на депонијата има гасови коишто тлеат и поради нив доаѓа до настанување на пожар и се многу тешки за гасење. Го ставивме под контрола целиот пожар речиси 70 проценти од депонијата е санирана, но останаа уште 30 проценти, оној дел висока платформа која е многу тешка и непристапна за работа за гасење на самата механизација“, изјави Даниел Стојчевски, директор на ЈП „Чистота и Зеленило“ Куманово.

Во гаснењето на пожарот интервенирале и кумановските пожарникари. Во изминативе пет години на депонијата имаше само два поголеми пожари.

И лани, во два-три наврати чадеше депонијата и надлежните од „Чистота и Зеленило“ сметаа дека е човечки фактор. Случаите се пријавени и во полицијата.

Трајно решение на проблемот надлежните гледаат во изградбата на трансфер центар во рамки на проектот за регионална депонија за источниот и североисточниот плански регион. Но, сè уште не е распишана постапка за санација на депонијата.

„Она што го имаме како информација од Министерството за животна средина и просторно планирање, постапката која беше распишана во текот на минатата година и фирмата којашто ја има добиено постапката за санирање на самата депонија го има откажано договорот и според нашите информации веќе во тек е нова постапка“, вели Стојчевски.

Регионалната депонија велат ќе биде од бенефит за општината, мештаните коишто живеат во непосредна близина и самото претпријатие.

Елена Георгиевска