„Кајмак“ ја освои наградата на специјалното жири на „Фантаспорто“ во Португалија

Филмот „Кајмак“ на македонскиот режисер Милчо Манчевски ја освои наградата на специјалното жири на филмскиот фестивал „Фантаспорто“ 2023 во Португалија.

Филмот „Кајмак“ е снимен во 2021-та година во режија и сценарио на Милчо Манчевски, а главните улоги ги играат Ратка Радмановиќ, Камка Тоциновски, Благоја Чоревски, Сара Климоска, Петар Мирчевски, во копродукција на Данска, Холандија, Хрватска и Северна Македонија, својата премиера ја имаше на кино- фестивалот во октомври минатата година во Токио, Јапонија.

Ова филмско остварување досега собра рекорден број на филмски награди. Македонската радио-телевизија е копродуцент на филмот „Кајмак“, којшто учествуваше и на белградскиот филмски фестивал „Фест“.

Филмот, кој е црна комедија и критика на малограѓанскиот морал и на илибералните тенденции во општеството, беше најгледан филм во Македонија во 2022-ра.