НАТО: Не сте сами во справувањето со хибридните закани

Хибридните напади и закани, и безбедносните предизвици тема на денешната средба на премиерот Ковачевски, министерот за внатрешни работи Спасовски, министерката за одбрана Петровска и министерот за информатичко општество и администрација Алиу со делегација на НАТО, предводена од заменик-помошникот генерален секретар, Џејмс Апатураи. Оценето дека станува збор за цинични обиди за внесување страв и немир кај граѓаните, но и за поткопување на довербата и кредибилитетот на институциите.

„НАТО и индивидуалните сојузници веќе споделуваат информации и овозможуваат техничка поддршка. За време на мојата посета дискутиравме за идните чекори кои можат да бидат преземени за да се засили сајбер безбедноста на земјата и да се зајакнат механизмите за ефективна владина акција“, изјави Џејмс Апатураи, заменик-помошник генерален секретар на НАТО.

Надлежните со експертскиот тим на Алијансата ги дискутирале мерките коишто се преземени досега. Уверуваат дека граѓаните се безбедни.

„Безбедносната ситуација е стабилна. Се соочуваме со интензивен хибриден напад чија цел е да внесе вознемирување, страв, паника и хаос кај граѓаните. Овие закани доаѓаат со разгорување на воената агресија на Русија врз Украина и тие се комбинација на странски и домашни актери“, изјави Даниела Илиоска, секретарот на Советот за координација на безбедносно-разузнавачката заедница.

Апатураи вели дека земјава нема сама да се справува со хибридните закани, и оти НАТО ќе продолжи да споделува знаења и техничка поддршка.

Катерина Топалова