Киев и Москва во битка за Бахмут

Руската паравоена група Вагнер се фали со триумф во источен Бахмут. Според украинскиот претседател Зеленски, падот на градот би значел отворање на патот за руските трупи кон другите градови.

„Министерот Шојгу ви кажа дека ако го заземеме Бахмут, ќе имаме оперативен простор. Досега, светот не се соочил со руската армија, доброобучените единици кои сè уште не влегле во битка, имајќи ги сите можно модерни оружја и опрема за разузнавање. Совршено подготвени, го чекаат своето време, времето по отворањето на оперативниот простор на „Вагнер’ по Бахмут. Но тоа е друга приказна. Тогаш ќе се тресе целиот свет“, изјави Јевгениј Пригожин, шеф на руската група „Вагнер“.

Војната меѓу Украина и Русија сè повеќе го зголемува и антагонизмот меѓу Истокот и Западот. Генералниот секретар на ОН, Гутереш во посета на Киев. НАТО бара дополнителна помош за Украина. Вниманието на медиумите повторно се врати на ланските напади врз гасоводот „Северен тек“, по извештајот на „Њујорк тајмс“. Киев ги отфрли обвинувањата американските разузнавачи дека зад нив стоеле проукраински групи.

„Чудна ми е приказнава, бидејќи истата нема никаква врска со нас. Истрагата ќе го опише секој детаљ. Ова е комплимент за нашите специјални единици, но активноста не е наша“, изјави Олексеј Резников, министер за одбрана на Украина.

„Треба да се утврди дали била украинска група, може да била по барање на Украина, или проукраинска без да знае владата. Но, да не се избрзува со заклучоците. Овие индикации не се мои, туку на експерти. Не ги присвојувам, но сакам да нагласам дека се зборува и за таканаречена „лажна операција“, вели Борис Писториус, министер за одбрана на Германија.

За Русија, медиумските извештаи се координирани напори да се сврти вниманието.

„Како можат американските функционери да претпостават нешто без истрага?“, прашува портпаролот на Кремљ, Песков.

Испораките на рускиот гас кон Германија, беа запрени уште пред експлозиите во септември, откако Русија го затвори „Северен тек 1“, а „Северен тек 2“ воопшто не профункционира. Точната причина за експлозиите не е утврдена, но се верува дека станува збор за организиран напад.

Маја С. Филдишев