СТРУГА

Бесплатен скрининг за бубрежни заболувања во струшка нефрологија

19.03.2023 15:34

Бесплатен скрининг за рано откривање на бубрежни заболувања во Специјалната болница за нефрологија во Струга. Голем број граѓани ја искористија можноста да направат прегледи и да ги слушнат советите од лекарите. Според статистиката во светот 850 милиони луѓе имаат некоја форма на бубрежна болест. Кај нас бројката е 150 илјади заболени од кои еден процент се на дијализа...

Во месецот на бубрегот Специјалната болница за нефрологија - Струга врши бесплатен скрининг за рано откривање на бубрежни заболувања. Голем број граѓани прават прегледи со мерење на крвен притисок и анализи на крвта.

Од болницата велат, врз основа на овие параметри првично може да се следи дали некој потенцијално болен има здравствени проблеми со бубрезите. Според лекарите најважно е рано откривање и третман на бубрежните заболувања.

„Нашата болница стои на располагање во секој момент во поглед на сите бубрежни болести, уролошки заболувања и други превентивни прегледи. Интересот за прегледи е доста голем“, изјави д-р Александар Попоски, директор на Нефрологија-Општа болница Струга.

Граѓаните добија препораки и совети. Посебен начин на исхрана, редовни прегледи и физичка активност се основите за здрави бубрези, советуваат лекарите, кои на пациентите им делеа и едукативни флаери.

„Има неколку препораки за бубрезите да останат здрави физичка активност и вежби, мерење на крвен шеќер, мерење на крвен притисок и негова регулација, пиење на многу течности посебно вода, здрава и правилна исхрана и престанок на пушење“, вели Попоски.

Според статистиката во светот 850 милиони луѓе имаат некоја форма на бубрежна болест. Кај нас бројката е 150 илјади заболени од кои еден процент се на дијализа.

 

Соња Рилковска