Костадиновска-Стојчевска: Поезијата на Шопов е моќен глас на македонската култура која денеска одекна во УНЕСКО

Според Костадиновска-Стојчевска, поезијата на Шопов има универзален карактер, и како таква допира до широката светска публика и со тоа ги афирмира во светот не само убавините на македонскиот јазик и книжевност, туку и на македонската култура воопшто.

Таа посочи дека во време кога нашироко се дебатира дали и зошто поезијата се наоѓа во најтивката фаза во својата историја, дали има влијание врз општествените процеси и која е, всушност, улогата на поетскиот збор во денешниот свет, Ацо Шопов јасно и недвосмислено ни разјаснува многу дилеми.

Препознавајќи го значењето на Ацо Шопов, УНЕСКО ја запиша стогодишнината од неговото раѓање во календарот на значајни јубилеи што ги поддржува Организацијата во 2022 и 2023 година. Ова е уште една потврда, додаде министерката за култура, дека нема ништо повозвишено и позначајно од споделувањето на културните вредности, особено кога сите заедно се залагаме и работиме на афирмација на европските вредности.

Костадиновска-Стојчевска потсети дека овој значаен културен настан е само дел од богатата програма што се одвива во рамките на националната иницијатива „2023 – Година во чест на Ацо Шопов“ под покровителство на претседателот на Република Северна Македонија, г. Стево Пендаровски. По тој повод, информираше таа, во текот на целата година ќе бидат организирани многубројни настани преку кои ќе се негува споменот на еден од најголемите поети во македонската култура на дваесеттиот век.

Министерката изрази благодарност до УНЕСКО и до генералната директорка на оваа еминентна организација, госпоѓа Одре Азуле, за организацијата на овој многу значаен културен настан за нас, подвлекувајќи дека УНЕСКО е наш партнер, наш заеднички дом на културата, со отворени врати за народите од целиот свет.

Во рамките на програмата, со која се прославува и Светскиот ден на поезијата – 21 Март, беа објавени и имињата на лауреатите на „Златниот венец на Струшките вечери на поезијата“ и на наградата „Мостови на Струга“.

Инаку, славејќи ги творештвото и поезијата на Ацо Шопов, на настанот во Париз се одржа меѓународниот симпозиум „Поезија, творештво, препев и оптек на делата на јазиците од помалите говорни подрачја“. Во рамките на програмата се одржа и проекција на анимираниот филм „Грозомор“, работен според истоимената песна на Ацо Шопов инспирирана од скопскиот земјотрес во 1963 година, како и поетскиот перформанс „Долго доаѓање на огнот“, а беше отворена и изложбата „Патот по кој чекорам“ посветена на творечкиот пат на Ацо Шопов.