Две лица уапсени за убиството во Капиштец, се трага по уште едно
Убиство во казино во скопски Капиштец. Жртвата, 46-годишен маж од Арачиново претходно со осомничениот играл на апаратите и по меѓусебна расправија, едниот извадил пиштол и пукал во лицето, кое починало на местото на настанот. Се работи на расчистување на случајот уверуваат од полицијата и од обвинителството…

Од забава во казино до убиство. Играта на слот машините во казиното кое се наоѓа во непосредна близина на булеварот „Теодосиј Гологанов“ во Капиштец заврши фатално за 46-годишниот арачиновец. Убиството се случило во 8 часот утринава, внатре во казиното-потврдуваат од МВР.
По кратка расправија двајцата играчи на слот машините се затуркале, по што едниот од нив извадил пиштол и пукал, а повреденото лице подлегнало на повредите.
Убиецот се дал во бегство, но неговиот идентитет е познат на истражните органи. Полицијата успеала да уапси двајца роднини кои се поврзани со убиството и се осомничени како сторители, а се трага по уште едно лице.
Дежурен јавен обвинител од Основното јавно обвинителство-Скопје изврши увид на самото место во казиното, по што се преземени мерки за расветлување на случајот
По наредба на јавен обвинител, телото на починатиот е предадено на обдукција. Ќе се врши вештачење на траги и докази подигнати од самото место и ќе се разговара со сведоци на настанот, велат од Обвинителството.
Од јавното обвинителство информираат дека обезбедени се снимки од видеонадзорот на објектот.
Марина Стојанова Тонева
