Премиера на претставата „Ако останеш дома“

„Ако останеш дома“ драма во еден чин по мотивите на оригиналот на Карој Сакони, во режија на Јован Ристовски е најновата премиера во битолскиот театар. Станува збор за трагикомедија со елементи на психолошка драма. Инспирацијата за оваа претстава е секојдневието на народот кој е несреќен и незадоволен повеќе од 30 години. На сцената мажот и жената претставуваат две птици во кафез кои ја изгубиле својата музика, а во публиката гледаат птици кои го изгубиле духот.

„Народот е генерално несреќен, го гледам го перцепирам како несреќен, сиромашен народ“, рече Јован Ристовски, режисер.

Главни улоги ги играат актерката Јулијана Мирчевска и актерот Васко Мавровски-кои ни пренесуваат приказна од секојдневието на еден брачен пар. Во претставата станува збор за отуѓеноста на луѓето. Како во трка по егзистенција, забораваме кои сме, кој е до нас, колку е важен тој што е до нас, и колку понекогаш ни значи наједноставното прашање: како си? Ние сме социјални битија на кои ни е потребна пред сè љубов-велат актерите Мирчевска и Мавровски.

Ова е втора по ред премиера на сцената на битолскиот театар за неполн месец, првата премиера „На отворено море, беше на 11-ти март.

Александра Максимовска