Директорот на АЕК во официјална посета на Јапонија

Директорот на Агенцијата за електронски комуникации Роберт Орданоски, во својство на потпреседател на Европското тело на регулатори за електронски комуникации (BEREC) оваа недела присуствува на официјална посета на Јапонија. Посетата е финансирана и организирана во рамки на меѓународната соработка на BEREC со регулатори и индустријата за електронски комуникации од развиени држави во светот.

Во рамки на посетата ќе бидат остварени средби со Министерството за внатрешни работи и комуникации на Јапонија со кои ќе се дискутира за модерните начини за регулација на пазарите за електронски комуникации, за ситуација на пазарите за електронски комуникации и за последните технички и технолошки трендови и развој. Покрај тоа ќе бидат остварени средби со претставници на високоразвиената информатичко комуникациска индустрија во Јапонија, соопштуваат од АЕК.

За новите софистицирани производи, нивните планови за развој и можности за инвестирање надвор од Јапонија ќе се разговара со Сони ериксон (Sony Ericsson), Нисан Моторс (Nissan Motors), Софтбанк (SoftBank), Нипон телеграф и телефон корпорација (Nippon Telegraph and Telephone Corporation, NTT), КДДИ корпорацијата (KDDI) и други.

Ваквиот тип на соработка и размена на искуства е од посебно значење, посебно во овој период кога се создава новата европска регулативна рамка во која активно учествува и Република Македонија преку Агенцијата за електронски комуникации.