Ван Хол ќе го зголеми бројот на вработени на 600

Белгиската компанија за производство на автобуси „Ван Хол“ најави проширување на производната линија и пласман покрај на американскиот и на европскиот пазар, како и зголемување на бројот на вработени од сегашните 430 на 600.

Премиерот Никола Груевски на официјалното отпочнување со работа на вториот капацитет на „Ван Хол“ изјави дека оваа инвестиција е од огромно значење за Република Македонија.

„Фабриката претставува инвестиција од 25 милиони евра и моментно вработува 430 наши сограѓани која бројка се очекува во наредниот период да достигне 600. Фабриката веќе работи активно, а околу сто автобуси произведени во неа се извезени во САД. Произведени се вкупно 140 автобуси, а во фаза на производство се 70, што значи дека веќе се работи на производство на 210 автобус во Македонија“, рече Груевски.

Директорот на компанијата Филип ван Хол, истакна дека во вториот квартал од годината ќе почнат да се произведуваат нови производи, овојпат наменети за европскиот пазар, за разлика од досегашните, кои се извезуваа во Америка.

Новиот капацитет на „Ван Хол“ се простира на површина од 37.000 метри квадратни и претставува втора најголема фабрика во Македонија.

Според Груевски, со оваа инвестиција се враќа традицијата на автобуската индустрија во државава, се отвораат нови работни места и се испраќаат позитивни пораки до другите инвеститори за бизнис климата.