Покренато обвинение против Трамп за задржување доверливи документи
Поранешиниот американски претседател Трамп се соочува со федерално обвинение. Новиот обвинителен акт се заснова на доверливите документи што беа пронајдени во неговиот дом на Флорида. Трамп вели дека не е виновен...
Прво федерално обвинение во историјата на САД против поранешен претседател. Доналд Трамп е под лупа на законот, втор пат во три месеци. Новиот обвинителен акт се заснова на доверливи документи откако го заврши мандатот.
„Јас сум невин човек. Не направив ништо лошо, и ќе се бориме со ова исто како што се боревме седум години. Би било прекрасно ако можеме да го посветиме нашето цело време за да ја направиме Америка повторно голема. Јас сум невин и тоа ќе го докажеме се надевам за многу брзо“, изјави Доналд Трамп, поранешен претседател на САД.
Во јануари 2021-ва година, Трамп замина од Белата куќа, а кутии со владини записи беа однесени во неговиот дом на Флорида. Илјадниците документи, подоцна беа запленети во рација на ФБИ во неговиот имот минатата година, вклучително и околу 100 класифицирани како доверливи.
„Покрај тоа што ова е прв федерален случај против поранешен претседател, ова е и прв федерален случај против водечки претседателски кандидат“, изјави Ерик Такер од „Асошиетед прес“.
Според „Њујорк Тајмс“, поранешниот американски претседател се товари за заговор за попречување на правдата, давање лажни изјави и свесно криење на националните одбранбени тајни и прекршување на Законот за шпионажа.
„Поранешниот претседател се очекува да се појави овде пред Федералниот суд во Мајами во вторник. Обвинението против Трамп вклучува седум точки, а две лица запознаени со предметот изјавија дека правниот тим на Трамп бил информиран непосредно пред јавно да го објави своето обвинение на сопствената платформа за социјални медиуми“, изјави Мајк Балсамо-АП, уредник на вести за спроведување на законот во САД.
Претседателот Џо Бајден вели дека нема влијание врз Министерството за правда.
„Забележувате дека никогаш не сум му предложил на Министерството за правда што треба да прават или да не прават во однос на поткренување или непокренување обвинение. Јас сум искрен!“, изјави Џо Бајден, претседател на САД.
Случајот претставува уште еден правен предизвик за Трамп, кој неодамна беше обвинет во Њујорк по 34 точки од обвинението за обид за прикривање на вонбрачна афера за време на претседателската кампања. Тој е под истрага и во Вашингтон и Атланта, што може да резултира со кривични пријави.
Маријана Димовска