Бундестагот ќе гласа за резолуција за поддршка на членството на Македонија во ЕУ
Германските пратеници ќе побараат од федералната влада да постигне согласност на ниво на ЕУ дека изгледите за пристапување во Унијата за Македонија, Албанија, Босна и Херцеговина, Косово, Црна Гора и Србија се „недвосмислени, веродостојни и поткрепени со опиплив напредок“...

Германскиот Бундестаг во четврток ќе гласа за резолуцијата за поддршка на членството на Македонија во Европската унија и потврда на македонскиот јазик и идентитет.
Насловена е „Активно поддржете ја Северна Македонија на нејзиниот пат кон Европската унија“, а ја предложи владејачката парламентарна група.
Германските пратеници ќе побараат од федералната влада да постигне согласност на ниво на ЕУ дека изгледите за пристапување во Унијата за Македонија, Албанија, Босна и Херцеговина, Косово, Црна Гора и Србија се „недвосмислени, веродостојни и поткрепени со опиплив напредок“.
Се бара категорично да биде одбиено секое поместување на границите на земјите од Западен Балкан, како и нивно приклучување во НАТО, засилена борба против корупцијата, продолжување на „Берлинскиот процес“ за регионална соработка и реформи во рамките на ЕУ, за да се обезбеди нејзиниот иден капацитет за прием на нови членки.
