Продолжува потрагата по подморницата „Титан“

Продолжува операцијата на спасувачките екипи од САД и од Канада по туристичката подморница „Титан“, што исчезна на патот до потонатиот „Титаник“ во Атлантикот. Спасувачите тврдат дека слушнале звуци на тропање во интервали, што ја враќа надежта. Се претпоставува дека последен пат била контактирана пред нејзиното конечно одредиште. Се верува дека има кислород да издржи под вода до четврток напладне.

Американската крајбрежна стража, пак, соопшти дека не се пронајдени знаци за исчезната подморница кај Нова Англија.

„Нашите екипажи работат деноноќно и правиме сè што е можно за да го лоцираме титан и петте членови на екипажот. Формиравме обединета команда, која се состои од експертиза на крајбрежната стража на соединетите држави. Ова е сложен напор за пребарување, кој бара повеќе агенции со експертиза и специјализирана опрема“, изјави капетан Џејми Фредерик, американска крајбрежна стража.

Пентагон и помага на крајбрежната стража на САД, а проширената меѓународна армада од бродови и авиони се приклучи на потрагата по подморницата.

„Одделот за одбрана помага во операциите за пребарување. Два авиона вршеа летови за пребарување и спасување. Морнарицата работи на обезбедување персонал како што се експерти и средства што е можно побрзо. Морнарицата и крајбрежната стража ќе останат во контакт за ова прашање“, изјави Сабрина Синг, заменик-прес секретар на Пентагон.

Спасувачите се во трка со времето за да ја пронајдат подморницата пред да истече снабдувањето со кислород за луѓето кои беа во мисија да ги документираат остатоците од Титаник.

Марина Ристова