Прибак, Петриќ и Марковиќ ги продолжија договорите
Македонскиот ракометен вицепрвак Вардар ги продолжи договорите со тројцата „староседелци“ во клубот.
Уште една година во Скопје остануваат Немања Прибак, Владимир Петриќ и Добривоје Марковиќ. Тие се најдоа во поголемата група ракометари кои му останаа верни на црвено-црниот дрес.
Прибак ќе ја почне петата сезона во Вардар, Марковиќ четвртата , исто како и највозрасниот Петриќ кој во август ќе наполни 39 години и најверојатно ќе ја заврши кариерата во овој клуб.
Вардар сака да ги сочува ракометарите кои учествуваа во освојувањето на ланската домашна првенствена титула, а оваа сезона го постигнаа најголемиот клупски успех во Европа со пласманот во четвртфиналето од Лигата на шампионите и со пехарот од Сеха лигата.
„Црвено-црните“ претходно ги продолжија договорите со Тимур Дибиров (6 години), Страхиња Милиќ (5 години), Игор Карачиќ, Илија Абутовиќ (3 години) и Алем Тоскиќ (1+1 година).
Екипата веќе се засили со Блаженко Лацкович и Сергеј Горбок а наскоро се очекува и расплетот за трансферот на голманот Арпад Штербик.
Клубот го напушта голманот Златко Даскаловски кој заминува во романскиот прволигаш Темишвар и Мите Стоилов кој исто така се сели во Романија во екипата на Одорхеи.