Продолжуваат немирите во Франција по убиството на тинејџер

Продолжуваат немирите по убиството на тинејџер од страна на полицаец во париското предградие Нантер. Запален автобус во Вири Шатијон, друго предградие на француската престолнина, а судири имаше и во самиот Нантер. 17-годишниот доставувач бил застрелан и убиен при сообраќајна контрола во вторникот. Инцидентот предизвика загриженост низ целата земја и широко распространети пораки на огорченост и сочувство.

Претседателoт Макрон на специјален безбедносен состанок рече дека актите на насилство врз полициска станица, училишта и градски сали се целосно неоправдани.

„Имаше некои акти на насилство против полициска станица, училишта, градски сали, против институциите и републиката. Овие дела се тотално неоправдани и сакам да им се заблагодарам на сите оние кои работеа да ги заштитат овие институции и да го вратат мирот. Ќе зборуваме за заштитата на сите места и институции и за она што се случи и подготовката за наредните денови за да може да се врати целосната смиреност“, изјави францускиот претседател Емануел Макрон.

Демонстрантите запалија автомобили и згради во париските предградија, а немирите се проширија и во други француски градови и населени места, и покрај зголемените безбедносни напори и повиците за смиреност.

Француските обвинители соопштија дека судии го испитуваат полицаецот што го уби тинејџерот.

Владата распореди 2.000 полицајци за да го одржува редот. Но, насилството продолжи и во текот на ноќта, а полицијата и пожарникарите се мачеа да ги задржат демонстрантите и да изгаснат бројни пожари.

Уапсени се повеќе од 150 луѓе.

Марина Ристова