Градоначалниците бараат решение за сметот, Арсовска им одговори да се зафатат со работа

Сметот ги мобилизира градоначалниците од скопскиот плански регион. Свикаа совет и напишаа четири точки. Бараат решение од градските власти за состојбата во која се најде метрополата во рок од 48 часа.

Го повикаа Советот на градот Скопје да ја разгледа ситуацијата на вонредна седница на која ќе се направи анализа на причините и последиците од нефункционирање на „Комунална хигиена“ и „Дрисла“. Градоначалниците предлагаат секоја општина да има свое претпријатие кое ќе се грижи за хигиената, но и распределба на буџетските пари. Советот на скопскиот плански регион бара од Владата итно да вклучи во санирање, како што велат на оваа елементарна непогода.

„Ако нема постапување, ќе поднесеме кривична пријава. Треба ли да дозволиме влошување на здравствената состојба во Скопје?! Граѓаните да не можат да излезат од дома зошто некој лови вештерки“, изјави градоначалникот на Општина Кисела Вода, Орце Ѓорѓиевски.

„Проблемот не треба да се политизира, станува збор за граѓаните и за нивното здравје и треба што поскоро да се реши“, нагласи градоначалникот на Општина Центар, Горан Герасимовски.

Градоначалничката Арсовска им порача прво да си ги исчистат своите населби.

„Коалицијата ДПМНЕ – СДСМ, наместо како инфлуенсери да се фотографираат на градските улици со нередот што го прават и политичките игри што ги играат, да се зафатат со работа и да престанат да си играат со нервите на скопјани. Сите тие се власт во градот Скопје и државата и треба да си постапуваат, а не да изигруваат инфлуенсери. Нека си ги исчистат своите населби, па после нека кажуваат“, рече градоначалничката на Град Скопје, Данела Арсовска.

Сите јавни претпријатија се надвор и градот ќе биде исчистен, вети градоначалничката.

Наташа Јанчиќ-Менковски