Почина 27 годишна штипјанка од Конго-кримска хеморагична треска, ја каснал крлеж

27 годишна жена од штипското село Кучица починала по каснување од крлеж. Инсектот кој бил изваден од кожата во домашни услови и пренел на жената конго-кримска хеморагична треска која се развила неколку дена подоцна. Пациентката била хоспитализирана во штипската болница, а потоа и на инфективната клиника во Скопје. Болеста по извршените анализи ја детектирале епидемиолозите од Институтот за јавно здравје од Скопје, но и од Штип. Со оглед на тоа што се пренесува и преку крв од заразеното лице, направени се претраги на сите контакти во семејството на починатата жена, но и во болниците каде била згрижена.

„Од контактите со висок ризик беа земени четири материјали за тестирање – сите негативни. Сите контакти од среден и висок ризик се ставени под здравствен надзор во наредните 14 дена“, информираат од Институтот за јавно здравје.

Конго-кримската хеморагична треска е болест која се пренесува преку крлежи, а смртноста достигнува и до 40 проценти. Преносот од човек на човек може да се случи како резултат на близок контакт со крв и телесни течности на заболените лица.

Миле Ристески