МРТ на терен со полицијата и моторџиите во Куманово

Екипата на Македонската телевизија на терен со полицијата и моторџиите. Се контролираат лицата што управуваат мотоцикли. Оние што го почитуваат законот, но пред сè внимаваат на личната безбедност и носат кациги, добија пофалба и подароци од полициските припадници и членовите на мотоклуб „Мечки“. Останатите пак вообичаено помладите што не поседуваат неопходна опрема, завршија со опомени.

„Целта на оваа превентивна активност е да се даде посебен акцент на младите мотоциклисти и нивните родители за поголемо внимание и грижа кон децата, зголемување на сообраќајната култура, мотоциклистите да се почитуваат како рамноправни учесници во сообраќајот, заштита на малолетниците од прекршување на правата и прописите“, изјави портпаролот на СВР Куманово, Ивана Младеновска.

Со ваквите превентивни акции целта е да се подигне нивото на сообраќајната култура, да не се прави непотребна бучава, но и да се намали бројот на жртви во сообраќајот.

„Обично во летно време кацигите не ги носат, бидејќи е многу топло, но тие пет минути кога ќе излезат, на кратки релации тогаш се случуваат тие несакани работи. Во кое било време, кога ќе управувате мотоцикл носете кацига, дали е топло или ладно тоа е најважната“, истакна Виктор Михајловски, претставник Мотоклуб „Мечки“ Куманово.

На подрачјето на Куманово изминативе три месеци, санкционирани се 407 мотоциклисти за неносење заштитен шлем, 43 за непоседување возачка дозвола и 12 биле нерегистрирани. Превентивната активност под мотото „Безбедно на мотор“ ја организираа отсекот за превенција при СВР Куманово и мотоклуб „Мечки“, заедно со општинскиот совет за безбедност во сообраќајот.

Елена Георгиевска