Иванов на средба со папата Франциск: Односите меѓу Македонија и Светата Столица се добри
Иванов и папата Франциск, јавува репортерот на МРТ, разговараа за состојбите во христијанството, релациите на Македонија и Ватикан, кои годинава одбележуваат 20 години од воспоставувањето на дипломатските односи, како и за прашања од историјата, филозофијата и секојдневието...
Македонскиот претседател Ѓорге Иванов во Ватикан на аудиенцијата кај папата Франциск. Разменети мислења за односите меѓу Република Македонија и Светата Столица. Иванов и папата Франциск констатирале дека тие се добри. Во македонската делегација се и министрите за надворешни работи и за образование, Попоски и Ристовски, и претседателот на Комисијата за односи со верските заедници Валентина Божиновска.
На средбата, Иванов и папата Франциск, јавува репортерот на МРТ, разговараа за состојбите во христијанството, релациите на Македонија и Ватикан, кои годинава одбележуваат 20 години од воспоставувањето на дипломатските односи, како и за прашања од историјата, филозофијата и секојдневието.
„Средбата со неговата светост помина во многу конструктивен дух. Имавме навистина содржајна средба, на која се потенцираше дека годинава по 46-ти пат се одбележува манифестацијата од страна на македонската делегација и дека се совпаѓа со одбележување 20 години од воспоставувањето дипломатски односи помеѓу Македонија и Ватикан“, изјави по средбата претседателот Иванов.
Со папата Францис, посочи Иванов, разговаравме за тоа како да ги негуваме во Македонија вредностите кои се и основа на христијанството, односно почитта на другиот, дијалогот меѓу луѓето и желбата за постигнување мир и сплотеност меѓу луѓето во нашата држава, како и секаде во светот, како мисија што ја промовира и Неговата светост.
Иванов и папата разговарале и за отворање на архивите во Ватикан. Шефот на државата се сретна и со државниот секретар на Светиот Престол, Монсињор Пјетро Паролин.
Во Италија, Иванов ќе има билатерална средба со италијанскиот колега Џорџо Наполитано, а ќе одржи и предавања на универзитетот „Федерико Втори“ во Неапол и на Институтот на Франко Фратини.
Во културната програма за чествувањето на „Свети Кирил“ се изложбата „Словенски ракописи од Македонија од 13-от до 19-от век и изведба на балетската претстава „14 часа“ во театарот „Курино“.
Црковната делегација ја предводи поглаварот на Македонската православна црква, Охридска Архиепископија господин господин Стефан, а во нејзиниот состав се и претставници на МПЦ и на Католичката црква во Македонија.