Чести пријави за измама при купување на производи
Најмногу поплаки во Организацијата на потрошувачи пристигнуваат за онлајн продажбата. Оттаму апелираат граѓаните, да не нарачуваат производи од непроверени компании и лица. Чести се и пријавите врзани со гарантни листови, но и за туристичките услуги..
Лоши искуства во поглед на квалитетот на производите, неможност за вршење замена. Брзиот начин на живот ги натера граѓаните сè почесто да купуваат онлајн, но тоа носи одредени ризици. Измамените можат да пријават во Организацијата на потрошувачи и во Пазарната инспекција, но парите нема да им бидат вратени бидејќи за производот не добиле фискална сметка.
Од Организацијата на потрошувачи, велат граѓаните да не нарачуваат производи од непроверени компании и лица. Апелираат да се информираат, дали за производот ќе добијат некаков документ за подоцна да можат да ги остварат своите права. Граѓаните пак, се жалат дека во маркетите цените на рафтовите и при плаќањето на каса не се идентични.
Чести се и пријавите во Oрганизацијата на потрошувачи врзани со гарантни листови. Поплаки стигнуваат и за туристички услуги, граѓани се жалеле дека одредени агенции не ги почитувале договорите.
Александра Спировска