Стенд-ап турнеја на актерот Бојан Велевски - „Све ли ја да мислам?!“

Велевски иако досега не беше многу присутен во медиумите, години наназад напорно работи со неговиот менаџер и настапува речиси во сите градови во Македонија. „Све ли ја да мислам?!“ ќе го има своето деби во Прилеп, на 13-ти септември, а големото финале ќе се случи на 18-ти ноември во Скопје, во Станица 26.

Текстописец на „Све ли ја да мислам?!“ е Божидар Божиновски, кој во контекст на инспирацијата во комичен манир истакна:

„Инспирација има насекаде околу нас, дури и во поголеми количини отколку што можат да се опфатат во час и нешто стенд-ап. Има за до пензија инспирација стендап да се пишуваат и после на децата да остане ко дуќанче. Со години чекам денови каде што ќе нема инспирација и ќе треба да се мисли на тапети или пердиња или со што и да се замараат оние што живеат во нормални општества. Опфатено е секојдневие, она што сме ние, она како сите ги гледаме другите и како другите нè гледаат нас, запознавање на природа и општество за повисоките одделенија“.

Велевски преку сатира, односно на специфичен, за него карактеристичен начин го означи почетокот на големата стенд-ап турнеја низ Македонија:

„Оваа турнеја ја правам пред сè за сцената. Како што тоа изминатиов период го направија ДНК, Некст Тајм и Дарио, време е и комичарите да почнат да прават големи работи, а не само настанчиња за 60-70 луѓе секој втора недела“, рече актерот, па додаде: „Затоа и ја барам поддршката од уметниците и општо сцената во Македонија. Да го свртиме вниманието кон стенд-ап сцената, која треба да е коректив во реално време на општеството“.

Долгогодишниот соработник на актерот и воедно негов менаџер Јане Јанев посочи дека целта на турнејата и мисијата на стенд-ап комедијата на Велевски е тоа Македонија да стане посреќно место за живеење.

„Бојан се потруди и промени доста од работите, почна безрезервно да помага на околината и на младите артисти, последниве 2 години ја обиколивме МК со карти достапни за сите и сето тоа само со една цел – Македонија да стане посреќно место за живеење, народот да биде насмеан, наместо гневен од општествените случувања. Поддршката за Бојан значи и поддршка за младите артисти, но и подавање рака на сите оние несреќници кои претходно пробале да затвораат врати“, искрен е Јане.

Точните датуми за градовите низ земјата, како и информации во однос на продажбата на картите можете да ги следите онлајн и на социјалните платформи на актерот Бојан Велевски.