Татко и син загинаа во пожар во Прилеп
Голема трагедија се случи синоќа во Прилеп. Во пожар во семејната куќа изгореа татко и син. Причините за трагедијата не се познати. Истрагата и обдукцијата ќе утврдуваат како настанал пожарот и смртта на двајцата прилепчани…
Татко на 80-тина години и неговиот 60-годишен син загинаа во пожарот што синоќа околу 21:45 часот ја зафатил нивната семејна куќа. Пожарникарите ги пронашле телата во куќата.
Едното тело, опожарено било пронајдено во дневната просторија, а другото, делумно во претсобјето. Лекарите само можеле да ја констатираат смртта.
Сосетка потврди дека во куќата живееле татко и двајца синови.
Полицијата и јавен обвинител направија увид. Се истражуваат причините за пожарот, а по обдукцијата ќе се знаат и причините за смртта на таткото и синот.
Елизабета Митреска